ஆசிரியையாக மாறிய அழகுப்புயல் ஸ்ரேயா!
அழகான நடிகை ஆசிரியையாக வந்தால் எந்த மாணவனுக்குத்தான் இதயம் கிடுகிடுக்காது. அந்த கிடுகிடு(கிளுகிளு)ப்பை, ஆமதாபாத்தில் உள்ள ‘இந்தியன் இன்டிடியூட் ஆப் மேனேஜ்மென்ட் கல்லூரி’ மாணவர்களுக்கு சமீபத்தில் கொடுத்திருக்கிறார் நடிகை ஸ்ரேயா.
கல்லூரி நிர்வாகம் கேட்டுக்கொண்டதற்கு இணங்க, சினிமா பற்றிய பாடம் எடுக்க திடீரென அந்த கல்லூரியின் ஒரு வகுப்பறைக்குள் நுழைந்திருக்கிறார் ஸ்ரேயா. அபிமான நடிகையை அருகில் பார்த்ததும் மாணவர்களுக்கு தலைகால் புரியவில்லை. பாடம் எடுத்த அழகு ஆசிரியையை அவ்வளவு சீக்கிரம் வெளியே விட மனமில்லாமல், சந்தேகம் என்கிற பெயரில் கேள்விகளைத் தொடர்ந்து வீசியிருக்கிறார்கள். அவற்றையெல்லாம் ஒருவழியாகச் சமாளித்து கல்லூரியை விட்டு புறப்பட்டிருக்கிறார் ஸ்ரேயா.
தான் பாடம் எடுத்த அனுபவம் குறித்து ஸ்ரேயா கூறுகையில், “சினிமா தொழில் குறித்து பாடம் எடுக்கத்தான் அந்தக் கல்லூரிக்குச் சென்றேன். இதற்காக தமிழ், தெலுங்கு, இந்தி படங்கள் பற்றி ஐந்து நாட்கள் படித்து நிறைய விஷயங்களை அறிந்துகொண்டுதான் அங்கு சென்றேன். உலக அளவில் நம்முடைய சினிமா மார்க்கெட்டின் நிலவரம் குறித்தும் பேசினேன். மாணவர்களும் ஏகப்பட்ட சந்தேகங்களைக் கேள்விகளாக்கி என்னிடம் கேட்டார்கள். அவர்கள் கேட்ட கேள்விகளுக்கு எப்படியோ பதில் சொல்லி சமாளித்தேன். என்னுடைய வாழ்க்கையில் மறக்கமுடியாத அனுபவம் இது” என்று கூறியிருக்கிறார்.
